SHBA Air Force Research Laboratory dhe kompania amerikane Ursa Major kanë përfunduar me sukses fluturimin e dytë testues të demonstratorit raketor ARMD, një projekt i ri ushtarak që synon zhvillimin e raketave me shpejtësi shumë të lartë dhe teknologji më fleksibile për operacionet moderne luftarake.
Sipas njoftimit zyrtar, demonstratori “ARMD” arriti sërish shpejtësi supersonike, vetëm 45 ditë pas testit të parë, një ritëm që konsiderohet jashtëzakonisht i shpejtë për industrinë e mbrojtjes amerikane. Programi po ndërtohet si bazë për raketa të ardhshme me kapacitete hipersonike dhe manovrim të avancuar.
Në qendër të projektit ndodhet motori raketor “Draper”, një motor me karburant të lëngshëm prej 4000 lbf shtytje, i cili kombinon avantazhet e motorëve tradicionalë të ngurtë me performancën e lartë të motorëve të lëngshëm. Ndryshe nga raketat klasike taktike që përdorin karburant të ngurtë, motori “Draper” mund të ndizet dhe të riniset gjatë fluturimit, duke mundësuar manovra komplekse dhe ndryshim të shpejtësisë në ajër.
Kompania Ursa Major bëri të ditur se motori përdor një kombinim jo-kriogjenik karburanti me vajguri dhe peroksid, që ruhet në temperaturë ambienti. Kjo shmang nevojën për sisteme të ndërlikuara ftohjeje dhe lejon vendosje më të shpejtë në terren.
Sipas ekspertëve, kjo teknologji mund të ndryshojë mënyrën sesi zhvillohen raketat taktike amerikane, duke i bërë ato më të lira, më të shpejta për prodhim dhe më të vështira për t’u neutralizuar.
Shefi i Propulsionit të Raketave në AFRL, Dr. Javier Urzay, deklaroi se projekti po avancon me ritëm të paprecedentë dhe se objektivi është krijimi i armëve të avancuara me kosto më të ulët dhe prodhim masiv.
Ndërkohë, CEO i Ursa Major, Chris Spagnoletti, theksoi se projekti demonstron aftësinë e SHBA-së për të projektuar dhe testuar sisteme raketore moderne “me shpejtësi dhe me çmim të përballueshëm”.
Përveç përdorimit ushtarak, kompania bëri të ditur se motori “Draper” mund të përdoret edhe në sektorin civil të hapësirës, përfshirë satelitët dhe mjetet logjistike orbitale.
