The Wall Street Journal ka raportuar se SHBA i ka dorëzuar Iran një kornizë të re negociuese për programin bërthamor, në një përpjekje për të rifilluar dialogun diplomatik mes dy vendeve pas tensioneve të fundit në Lindjen e Mesme.
Sipas raportit, në rast se Teherani pranon propozimin amerikan, palët do të hyjnë në një periudhë 30-ditore negociatash intensive për të arritur një marrëveshje më të gjerë dhe afatgjatë.
Dokumenti amerikan përmban një sërë kushtesh dhe “vijash të kuqe” që Uashingtoni kërkon të zbatohen nga Irani. Mes tyre përfshihet garancia zyrtare nga autoritetet iraniane se nuk do të zhvillojnë armë bërthamore, si dhe çmontimi i objekteve kryesore bërthamore në Fordow, Natanz dhe Isfahan.
Korniza e propozuar parashikon gjithashtu ndalimin e plotë të aktiviteteve bërthamore nëntokësore dhe krijimin e një sistemi inspektimesh të rrepta ndërkombëtare, me penalitete në rast shkeljesh.
Një nga pikat kryesore të planit është vendosja e një moratoriumi 20-vjeçar për pasurimin e uraniumit nga Irani, një kompromis krahasuar me kërkesën fillestare amerikane për ndalim të përhershëm. Po ashtu, Teheranit i kërkohet dorëzimi i të gjitha rezervave ekzistuese të uraniumit të pasuruar.
Në këmbim, SHBA-ja do të shqyrtojë lehtësimin gradual të sanksioneve ekonomike dhe zbutjen e bllokadës në rajon, ndërsa pjesë e marrëveshjes është edhe rihapja e Strait of Hormuz për lundrim ndërkombëtar.
Sipas raportimit, lehtësimi i masave amerikane do të bazohet në performancën dhe respektimin e marrëveshjes nga Irani, duke mos u ofruar paraprakisht.
Ky zhvillim shihet si një tentativë për të shmangur përshkallëzimin e mëtejshëm të konfliktit në rajon, megjithëse skepticizmi mbetet i lartë si në Uashington ashtu edhe në Teheran për mundësinë e arritjes së një marrëveshjeje përfundimtare.
