Donald Trump ka deklaruar se po shqyrton mundësinë e zhvendosjes së një pjese të trupave amerikane nga Gjermania në Polonia, në kuadër të një ristrukturimi të pranisë ushtarake amerikane në Evropë.
Duke folur para gazetarëve në Shtëpinë e Bardhë, Trump tha se Varshava e mbështet fuqishëm këtë ide dhe e konsideroi të realizueshme një lëvizje të tillë.
“Polonia do ta donte këtë. Ne kemi marrëdhënie të shkëlqyera me Poloninë. Kam marrëdhënie shumë të mira me presidentin Karol Nawrocki. Është e mundur… mund ta bëj”, deklaroi Trump.
Presidenti amerikan përmendi edhe mbështetjen që i kishte dhënë më herët Karol Nawrocki gjatë zgjedhjeve në Poloni, duke e quajtur atë “luftëtar të shkëlqyer”.
Sipas raportimeve mediatike, administrata amerikane planifikon të tërheqë rreth 5 mijë trupa nga Gjermania gjatë 6 deri në 12 muajt e ardhshëm. Aktualisht, në territorin gjerman ndodhen mes 35 mijë dhe 37 mijë ushtarë amerikanë.
Nga ana tjetër, Polonia ka shprehur gatishmëri të plotë për të pritur trupat amerikane. Nawrocki deklaroi se vendi i tij tashmë posedon infrastrukturën e nevojshme ushtarake dhe se një prani më e madhe amerikane do të forconte sigurinë në krahun lindor të NATO.
“Është në interes të Polonisë, Lituanisë dhe shteteve baltike që sa më shumë trupa amerikane të stacionohen këtu”, tha Nawrocki.
Debati për zhvendosjen e trupave zhvillohet në një periudhë tensionesh të vazhdueshme mes administratës Trump dhe Berlinit. Që nga mandati i tij i parë, Trump ka kritikuar vazhdimisht Gjermaninë për shpenzime të ulëta në mbrojtje dhe ka kërkuar rishikim të rolit amerikan në Evropë.
Ekspertët e sigurisë vlerësojnë se prania amerikane në Gjermani ka jo vetëm rëndësi ushtarake, por edhe simbolike e historike për NATO-n dhe stabilitetin evropian.
Ish-ambasadori polak në NATO, Tomasz Szatkowski, deklaroi se nëse reduktimi i trupave bëhet realitet, Polonia duhet të angazhohet fuqishëm që këto forca të zhvendosen në territorin e saj.
