Vladimir Putin ka deklaruar se beson që lufta në Ukraina po shkon drejt përfundimit, ndërsa ka lënë të hapur mundësinë e një takimi me presidentin ukrainas vetëm pas arritjes së një marrëveshjeje paqeje.
Duke folur para gazetarëve, Putin tha se konflikti duket se po hyn në fazën përmbyllëse.
“Unë besoj se çështja po i vjen fundi”, deklaroi presidenti rus.
Ai shtoi se është i gatshëm të takohet me Volodymyr Zelensky vetëm nëse paraprakisht arrihet një marrëveshje e qëndrueshme për paqe.
Ndërkohë, Putin komentoi edhe mundësinë e bisedimeve me liderët evropianë, duke thënë se figura e tij e preferuar për dialog mbetet Gerhard Schröder.
Deklaratat vijnë në kohën kur, sipas raportimeve të Financial Times, liderët e Bashkimi Evropian po shqyrtojnë mundësinë e rifillimit të kontakteve diplomatike me Moskën.
Kremlini ka argumentuar se janë vendet evropiane ato që ndërprenë komunikimin me Rusinë pas nisjes së luftës në vitin 2022 dhe se hapi i parë për rikthimin e dialogut duhet të vijë prej tyre.
Putin foli edhe për propozimin e Donald Trump lidhur me shkëmbimin e të burgosurve mes Rusisë dhe Ukrainës, duke pretenduar se Moska ende nuk ka marrë përgjigje nga pala ukrainase.
“Pala ukrainase duhet t’i përgjigjet propozimit të bërë nga presidenti i Shteteve të Bashkuara. Deri më sot nuk kemi marrë asnjë propozim”, tha ai.
Presidenti rus komentoi gjithashtu situatën në Lindjen e Mesme, duke shprehur shpresën që konflikti me Iranin të përfundojë sa më shpejt.
Në fund, Putin u ndal edhe te aspiratat evropiane të Armenia, duke thënë se do të ishte “logjike” që qytetarët armenë të vendosin përmes referendumit mbi anëtarësimin eventual në BE.
“Do të ishte plotësisht logjike të mbahej një referendum dhe t’i kërkohej popullit armen se cila është zgjedhja e tyre”, deklaroi Putin.
