Deputeti dhe kandidati i PDK-së, Mërgim Lushtaku, ka reaguar pas zhvillimeve të mbrëmjes në Skenderaj, duke i cilësuar veprimet e Policisë së Kosovës si pjesë të një “skenografie” politike të pushtetit.
Përmes një reagimi publik, Lushtaku ka akuzuar qeverinë në detyrë për instrumentalizim të institucioneve të sigurisë, duke pretenduar se prezenca e policëve me maska në Skenderaj ishte e panevojshme dhe me prapavijë politike.
“Gjithçka që po shohim sonte në Skënderaj është skenografi e këtij regjimi autoritar. Disa policë me maska, pa asnjë nevojë, vetëm për të shërbyer si një polici politike e private e Albin Kurtit”, ka deklaruar Lushtaku.
Megjithatë, ai ka bërë dallim mes kritikës ndaj veprimeve që pretendon se janë politike dhe respektit për institucionin e Policisë së Kosovës.
“Gjithsesi, respekt për uniformën që mbajnë. Shumë gjak është derdhur në tokën e lavdishme të Drenicës që një ditë ta kemi shtetin dhe policinë tonë”, ka shtuar ai.
Reagimi vjen në një klimë tensionesh politike në Skenderaj, pas incidentit fizik të raportuar më herët ku u përfshi zyrtari i Lëvizjes Vetëvendosje, Hysni Mehani, rast për të cilin tashmë Prokuroria ka ndaluar dy persona dhe hetimet janë në zhvillim.
