Diaspora e Kosovës pritet të luajë rol kyç në zgjedhjet e parakohshme parlamentare të 7 qershorit, duke qenë edhe e para që do të shprehë vullnetin e saj përmes procesit të votimit nga jashtë vendit.
Sipas të dhënave të fundit nga Komisioni Qendror i Zgjedhjeve (KQZ), deri në orën 10:00 të së dielës janë pranuar mbi 117 mijë kërkesa për regjistrim të votuesve nga diaspora, duke shënuar një interesim dukshëm më të lartë krahasuar me zgjedhjet e kaluara.
Nga këto aplikime, 99,498 janë aprovuar, 7,621 janë refuzuar, ndërsa mbi 10 mijë të tjera mbeten në pritje të shqyrtimit.
Sipas shpërndarjes së votuesve të regjistruar:
- 22,955 qytetarë janë regjistruar për të votuar fizikisht në përfaqësitë diplomatike,
- 2,590 votues kanë zgjedhur të dërgojnë fletëvotimin në kutinë postare të KQZ-së në Kosovë,
- ndërsa 73,953 qytetarë do të votojnë duke e dërguar pakon me fletëvotim në adresat postare jashtë Kosovës.
Krahasuar me zgjedhjet e parakohshme të 28 dhjetorit 2025, këtë herë janë regjistruar mbi 22 mijë votues më shumë, çka tregon një mobilizim më të madh të mërgatës.
Gjermania prin bindshëm me numrin më të madh të votuesve të regjistruar, me 49,102 aplikime, e ndjekur nga Zvicra me 23,456.
Shtetet me numrin më të madh të votuesve të regjistruar janë:
- Gjermani – 49,102
- Zvicër – 23,456
- Francë – 4,193
- Suedi – 3,750
- Austri – 3,165
- Mbretëri e Bashkuar – 2,370
- Itali – 2,206
- SHBA – 2,070
- Belgjikë – 2,024
- Slloveni – 1,400
- Norvegji – 1,154
- Finlandë – 1,010
Ish-kryetarja e KQZ-së, Valdete Daka, e ka lidhur këtë rritje me faktin se në zgjedhjet e fundit të dhjetorit një pjesë e madhe e diasporës ndodhej fizikisht në Kosovë dhe kishte votuar drejtpërdrejt, pa pasur nevojë për regjistrim si votues jashtë vendit.
Megjithatë, ajo ka ngritur shqetësime për sfidat që shoqërojnë procesin e votimit nga diaspora, duke përmendur pengesat dhe dyshimet që u shfaqën në zgjedhjet e kaluara lidhur me transportimin dhe administrimin e votave.
Afati për regjistrimin e votuesve nga diaspora përfundon sonte në mesnatë, ndërsa votimi me postë do të zhvillohet nga 25 maji deri më 6 qershor, kurse votimi në përfaqësitë diplomatike do të mbahet më 6 qershor, një ditë para zgjedhjeve në Kosovë.
