Kryeqyteti ka inauguruar një nga projektet më të rëndësishme infrastrukturore të viteve të fundit, me Unazën e Brendshme të Prishtinës që tashmë është vënë zyrtarisht në funksion për qytetarët.
Lajmi është bërë i ditur nga Komuna e Prishtinës, e cila e cilësoi këtë investim si një projekt madhor dhe të domosdoshëm për lehtësimin e qarkullimit në një nga zonat më të ngarkuara të kryeqytetit.
Kryetari i Prishtinës, Përparim Rama, përmes një reagimi publik konfirmoi përfundimin e projektit me mesazhin: “Unaza e Brendshme u kry ✔️ Vazhdojmë Prishtinë 💪💙”.
Sipas komunës, aksi i ri pritet të sjellë lehtësim të ndjeshëm të trafikut, duke krijuar një qarkullim më efikas për mijëra qytetarë që përballen çdo ditë me kolonat dhe mbingarkesën në komunikacion.
Projekti përfshin ndriçim modern, hapësira të dedikuara për këmbësorët dhe organizim të ri të lëvizjes, me synimin për ta bërë Prishtinën më funksionale, më të lidhur dhe më të sigurt.
Nga komuna theksohet se ky investim nuk nënkupton vetëm ndërtim infrastrukture, por edhe rritje të sigurisë rrugore, ulje të ngarkesës në trafik dhe përmirësim të lëvizshmërisë urbane në kryeqytet.
