Policia e Kosovës ka ngritur alarmin për një rritje të rasteve të mashtrimeve financiare përmes SMS-ve të rreme që dërgohen në emër të bankave, duke u bërë thirrje qytetarëve që të tregojnë kujdes maksimal.
Sipas njoftimit të Drejtorisë Rajonale të Policisë në Prizren, qytetarë të shumtë kanë raportuar se kanë pranuar mesazhe mashtruese ku paralajmërohen se xhirollogaritë e tyre do të bllokohen nëse nuk ndërmarrin veprime të menjëhershme.
Në këto mesazhe përfshihet një link i dyshimtë, përmes të cilit qytetarëve u kërkohet të fusin të dhënat personale dhe bankare. Pas dhënies së këtyre informacioneve, mashtruesit arrijnë të marrin kontroll mbi llogaritë dhe të tërheqin mjetet financiare në mënyrë të kundërligjshme.
Policia ka apeluar që qytetarët:
- Të mos klikojnë në linqe të dyshimta të dërguara përmes SMS-ve apo email-eve;
- Të mos japin të dhëna personale, fjalëkalime apo kode bankare në faqe të pasigurta;
- Të raportojnë menjëherë në polici nëse dyshojnë se janë mashtruar.
“Mos bini pre e mashtrimeve dhe mos klikoni në lidhje të panjohura të dërguara përmes SMS-ve apo email-eve”, thuhet në apelin e Policisë së Kosovës.
Autoritetet theksojnë se mbeten të angazhuara në identifikimin dhe ndjekjen e personave që qëndrojnë pas këtyre mashtrimeve, ndërsa qytetarëve u kërkohet vigjilencë maksimale për të mbrojtur sigurinë e tyre financiare.
