I nominuari i presidentit amerikan Donald Trump për ambasador të Shteteve të Bashkuara në Shqipëri, Eric Wendt, ka paraqitur para Komitetit për Marrëdhënie me Jashtë të Senatit amerikan prioritetet e tij diplomatike, duke vënë theks të veçantë te mbështetja për SPAK-un, lufta kundër korrupsionit, krimit të organizuar dhe trafikut të drogës.
Gjatë dëshmisë së tij, Wendt e cilësoi SPAK-un si një strukturë kyçe dhe jopolitike, duke premtuar se do të mbështesë fuqishëm punën e tij nëse konfirmohet në detyrë.
“SPAK është një strukturë e rëndësishme jopolitike. Nëse konfirmohem, do ta shtyj përpara dhe do ta mbështes punën e tyre të papolitizuar”, deklaroi Wendt.
Ai tha se mbështetja ndaj Shqipërisë në luftën kundër korrupsionit dhe rrjeteve kriminale ndërkombëtare do të ndihmojë jo vetëm sigurinë e Shqipërisë, por edhe atë të SHBA-së.
“Mbështetja ndaj Shqipërisë në vazhdimin e luftës kundër korrupsionit, si edhe kundër krimit të organizuar ndërkombëtar dhe trafikut të drogës, do ta bëjë Amerikën dhe Shqipërinë më të sigurta”, u shpreh ai.
Në fjalimin e tij, Wendt vlerësoi edhe bashkëpunimin me ushtrinë shqiptare gjatë misioneve të NATO-s, duke thënë se forcat speciale shqiptare “mishërojnë shpirtin luftarak të heroit Skënderbeu”, ndërsa popullin shqiptar e përshkroi si “krenar, punëtor dhe mikpritës”.
Ai prezantoi katër shtylla kryesore të punës së tij diplomatike: sigurinë, mbrojtjen, prosperitetin ekonomik dhe forcimin e misionit diplomatik amerikan në Tiranë.
Në fushën e mbrojtjes, Wendt tha se do të punojë për rritjen e bashkëpunimit ushtarak dhe për përmbushjen e objektivave të NATO-s, përfshirë synimin për rritjen e shpenzimeve për mbrojtje në 5% të PBB-së deri në vitin 2035.
Sa i përket ekonomisë, ai përmendi sektorët e inteligjencës artificiale, energjisë, infrastrukturës dhe minierave, duke theksuar se investitorët amerikanë duhet të kenë kushte të drejta dhe të barabarta në Shqipëri.
Emërimi i Wendt shihet si sinjal se administrata Trump synon të mbajë fokus të fortë në drejtësi, siguri dhe ndikim strategjik amerikan në Shqipëri dhe rajon.
