Presidenti amerikan Donald Trump ka deklaruar se është në koordinim të plotë me kryeministrin izraelit Benjamin Netanyahu lidhur me strategjinë ndaj Iranit, teksa ka lënë të kuptohet se Uashingtoni dhe Tel Avivi po veprojnë në sinkron të plotë për zhvillimet në Lindjen e Mesme.
Gjatë një deklarate për media nga një bazë ajrore në Maryland, Trump u shpreh me tone lavdëruese për liderin izraelit.
“Do të bëjë gjithçka që do t’i kërkoj. Është një njeri shumë, shumë i mirë”, tha Trump për Netanyahun.
Presidenti amerikan theksoi se kryeministri izraelit po udhëheq vendin në një periudhë lufte dhe përballet me presion të madh politik.
“Ai është kryeministër në kohë lufte dhe nuk besoj se do të trajtohet mirë”, deklaroi Trump.
Në një moment, Trump përdori edhe humor për popullaritetin e tij në Izrael, duke bërë një koment ironik për një kandidim të mundshëm politik atje.
“Aktualisht jam në 99% në Izrael. Mund të kandidoja për kryeministër. Ndoshta pasi të mbaroj me këtë, do të shkoj në Izrael dhe do të kandidoj”, tha ai me shaka.
Deklaratat e tij vijnë pas raportimeve të mediave izraelite se Trump dhe Netanyahu kanë zhvilluar një telefonatë të gjatë dhe intensive gjatë natës, ku besohet se është diskutuar situata me Iranin.
Trump shtoi se nuk është duke nxituar për një marrëveshje paqeje me Iranin, duke sinjalizuar se administrata amerikane po mban të hapura të gjitha opsionet për zhvillimet e ardhshme në rajon.
