Një incident me përmbajtje të qartë të gjuhës së urrejtjes ka nxitur reagime në Maqedoninë e Veriut, pas shfaqjes së një parulle antishqiptare në Shkup.
Ngjarja vjen në një periudhë tensioni pas protestave të studentëve shqiptarë, të cilët kanë kërkuar të drejtën për ta dhënë provimin e jurisprudencës në gjuhën amtare.
Në rrjetet sociale po qarkullon një fotografi nga afër qendrës sportive “Forca” në Shkup, ku në mur është shkruar slogani ofendues: “As në tokë, as në qiell, vend për shqiptarët nuk ka.”
Mesazhi është dënuar nga aktivistë dhe figura publike, të cilët e kanë cilësuar si nxitje të urrejtjes etnike dhe kanë kërkuar reagim të menjëhershëm nga institucionet kompetente.
Deri më tani, nuk raportohet për ndonjë reagim zyrtar nga autoritetet maqedonase lidhur me incidentin.
Ky rast shton shqetësimet për përkeqësimin e klimës ndëretnike në vend. Edhe në raste të mëparshme janë raportuar thirrje dhe kore fyese ndaj shqiptarëve gjatë aktiviteteve sportive, duke ngritur alarm për rritjen e retorikës së urrejtjes në hapësirën publike.
