Kompania për Distribuimin e Energjisë Elektrike në Kosovë (KEDS) ka bërë të ditur se të premten, më 22 maj 2026, do të realizohen punime të planifikuara për mirëmbajtjen dhe sigurinë e sistemit energjetik, si rezultat i të cilave do të ketë ndërprerje të përkohshme të furnizimit me energji elektrike në disa rajone të vendit.
Sipas njoftimit, ndërprerjet do të prekin zona të ndryshme në Prishtinë, Pejë, Prizren, Ferizaj, Mitrovicë dhe Gjakovë, ku do të realizohen punime preventive, projekte investive dhe ndërhyrje teknike për sigurinë e sistemit.
Në rajonin e Prishtinës, ndërprerjet do të përfshijnë disa fshatra dhe lagje të Podujevës, përfshirë Sibofcin, Lluzhanin, Lupçin e Epërm, Sekiraqën, Gllamnikun, Ballovcin dhe pjesë të qytetit të Podujevës. Punimet janë planifikuar kryesisht nga ora 10:00 deri në 15:30 dhe lidhen me mirëmbajtjen e nënstacioneve.
Në Pejë, ndërprerjet do të ndodhin në disa fshatra të Deçanit, përfshirë Beranin, Prapaqanin, Krushevcin e Ri dhe Vranocin, për shkak të projekteve investive dhe zhvendosjes së pikave të furnizimit.
Ndërkohë, në rajonin e Prizrenit, pa energji do të mbesin Atmaxha, Nasheci, Mazreku, Kojusha, Gjonaj dhe Zymi, si pasojë e mirëmbajtjes preventive dhe pastrimit të trasesë.
Edhe në Ferizaj janë planifikuar ndërprerje në disa zona, përfshirë Varoshin, Gërlicën, Gremin dhe disa zona biznesi, ndërsa në Mitrovicë punimet do të prekin Rahovën, Zhazhën, Selacin, Boletinin dhe disa lokalitete të tjera.
KEDS ka apeluar te qytetarët dhe bizneset që të planifikojnë aktivitetet e tyre sipas orarit të publikuar, duke theksuar se punimet janë të nevojshme për rritjen e sigurisë dhe stabilitetit të rrjetit energjetik.
