Vladimir Putin dhe Xi Jinping kanë diskutuar mundësinë e transferimit dhe ruajtjes së uraniumit të pasuruar të Iranit në Rusi, gjatë takimit të zhvilluar në Pekin.
Lajmi është bërë i ditur nga Kremlini gjatë vizitës së presidentit rus në Kinë. Sipas Dmitry Peskov, Putin e ka paraqitur këtë ide gjatë bisedimeve me liderin kinez.
Sipas njoftimit rus, çështja e uraniumit ishte pjesë e diskutimeve më të gjera mbi sigurinë rajonale dhe zhvillimet ndërkombëtare, në një kohë kur tensionet lidhur me programin bërthamor iranian dhe situata në Lindjen e Mesme vazhdojnë të mbeten të larta.
Pas takimit, Rusia dhe Kina publikuan një deklaratë të përbashkët, ku shprehën shqetësim për atë që e cilësuan si rrezik të “rikthimit të ligjit të xhunglës” në marrëdhëniet ndërkombëtare.
Në deklaratë, të dy vendet kritikuan gjithashtu përpjekjet për dominim në politikën globale, në një formulim që është interpretuar si kritikë indirekte ndaj administratës së Donald Trump.
Takimi mes Putinit dhe Xi-t vjen në një periudhë të intensifikimit të bashkëpunimit strategjik mes Moskës dhe Pekinit, veçanërisht në çështjet e sigurisë, energjisë dhe politikës ndërkombëtare.
