Presidenti i SHBA-së, Donald Trump dhe Sekretari i Shtetit Marco Rubio kanë rritur tensionet me Kubën, duke rikthyer në diskutim mundësinë e një ndërhyrjeje ushtarake ndaj ishullit, vetëm pak ditë pasi administrata amerikane shtoi presionin politik dhe juridik ndaj Havanës.
Gjatë një deklarate në Shtëpinë e Bardhë, Trump tha se presidentë të tjerë amerikanë e kishin shqyrtuar ndër vite mundësinë e veprimit ndaj Kubës, duke lënë të kuptohet se ai mund të jetë presidenti që do të ndërmarrë hapa konkretë.
“Presidentë të tjerë e kanë parë këtë për 50 apo 60 vjet… dhe duket se unë do të jem ai që do ta bëjë”, deklaroi Trump.
Nga ana tjetër, Rubio deklaroi se Kuba vazhdon të konsiderohet një rrezik për sigurinë kombëtare amerikane për shkak të lidhjeve të saj me Rusinë, Kinën dhe partnerë të tjerë strategjikë të SHBA-së në rajon. Ai theksoi se administrata amerikane preferon një zgjidhje diplomatike, por shtoi se gjasat për marrëveshje me udhëheqjen aktuale kubane “nuk janë të larta”.
Përshkallëzimi i deklaratave vjen pas ngritjes së akuzave penale nga autoritetet amerikane ndaj ish-presidentit kuban Raúl Castro, lidhur me rrëzimin e avionëve civilë në vitin 1996. Ky zhvillim ka rritur më tej tensionet diplomatike mes dy vendeve.
Megjithatë, raportime të mëhershme nga media amerikane, duke cituar burime të administratës, kanë bërë të ditur se SHBA-të aktualisht nuk po përgatitin një operacion të menjëhershëm ushtarak ndaj Kubës, pavarësisht retorikës së ashpër politike.
Në javët e fundit, Uashingtoni ka shtuar sanksionet ndaj zyrtarëve kubanë dhe ka intensifikuar presionin ekonomik ndaj Havanës, duke e paraqitur këtë si pjesë të një strategjie më të gjerë për ndryshime politike në vend.