NATO i ka dërguar ftesë zyrtare presidentit të Ukrainës, Volodymyr Zelenskyy, për të marrë pjesë në samitin e liderëve të aleancës që do të mbahet më 7–8 korrik në Ankara.
Lajmi është konfirmuar nga Sekretari i Përgjithshëm i NATO-s, Mark Rutte, gjatë takimit të ministrave të jashtëm të aleancës në Helsingborg.
“E kam ftuar tashmë, po, ai do të jetë aty”, deklaroi Rutte.
Ftesa për presidentin ukrainas vjen në një moment kur brenda aleancës kanë ekzistuar diskutime lidhur me pjesëmarrjen e vendeve partnere që nuk janë anëtare të NATO-s. Më herët, Shtetet e Bashkuara kishin shprehur rezerva për përfshirjen në samite të partnerëve si Ukraina, Australia, Zelanda e Re, Japonia dhe Koreja e Jugut.
Samiti në Ankara pritet të përfshijë takimin zyrtar të liderëve të vendeve anëtare, si dhe një forum të veçantë për industrinë e mbrojtjes, ku do të marrin pjesë edhe shtete partnere jashtë aleancës.
Megjithatë, pavarësisht deklaratës së Ruttes, pjesëmarrja e Zelenskyt ende nuk konsiderohet e finalizuar. Sipas një zyrtari evropian të cituar nga POLITICO, presidenti ukrainas ende nuk e ka konfirmuar zyrtarisht pranimin e ftesës.
“Gjithçka është ende duke u vendosur. Të gjithë janë në pritje”, tha zyrtari.
Po ashtu, NATO po shqyrton mundësinë e ftesës edhe për disa vende të Lindjes së Mesme, përfshirë Bahreinin, Kuvajtin, Katarin dhe Emiratet e Bashkuara Arabe, me kërkesë të Turqisë si vend organizator i samitit.
