Anëtarët e Partisë Demokratike do t’u drejtohen sot kutive të votimit për të zgjedhur kryetarin që do ta drejtojë forcën politike për katër vitet e ardhshme.
Procesi i votimit do të zhvillohet nga ora 08:00 deri në orën 18:00 në të gjitha degët e Partisë Demokratike në rrethe. Ndryshe nga proceset e fundit zgjedhore brenda partisë, këtë herë numërimi i votave do të kryhet në degët lokale dhe jo në selinë qendrore të PD-së.
Në këto zgjedhje nuk do të ketë garë mes kandidatëve, pasi ish-kryeministri Sali Berisha është i vetmi emër në fletën e votimit. Vetë Berisha e ka cilësuar procesin e 23 majit si një referendum për kryetarin dhe një test besimi nga anëtarësia demokrate.
Gjatë një deklarate të mëparshme, ai u bëri thirrje demokratëve të marrin pjesë masivisht në votim, duke e konsideruar procesin si një tregues të demokracisë së brendshme në parti.
“Ftoj të gjithë anëtarët e PD-së që, në një akt përgjegjësie dhe vlerësimi për qëndresën dhe angazhimin e tyre, të votojnë në liri të plotë”, është shprehur Berisha.
Ndërkohë, gjatë fazës përgatitore të zgjedhjeve, Komisioni i Zgjedhjeve në PD përjashtoi disa emra që kishin shprehur interes për të kandiduar përballë Berishës. Mes tyre ishin Evi Kokalari, Ervin Salianji, Alesia Balliu, Mereme Sela dhe Vladimir Mulaj.
Procesi i sotëm pritet të përcaktojë drejtimin e Partisë Demokratike për mandatin e ardhshëm katërvjeçar.