Kryeministri i Kosovës, Albin Kurti, ka zhvilluar një bashkëbisedim me studentë shqiptarë nga treva të ndryshme gjatë qëndrimit të tij në Zvicër, ku fokusi kryesor ishte te çështjet kombëtare, arsimi, historia dhe roli i rinisë në të ardhmen.
Kurti bëri të ditur se gjatë diskutimit u trajtuan tema që lidhen me lëvizjet kombëtare, shkencën, librin dhe zhvillimin arsimor, ndërsa rekomandoi edhe disa vepra që sipas tij kanë rëndësi të veçantë për njohjen e historisë dhe mendimit politik shqiptar.
Mes librave të përmendur ishin Shqipëria ç’ka qenë, ç’është dhe ç’do të bëhet e Sami Frashëri, Filozofia politike e çështjes shqiptare e Ukshin Hoti, Kosova e Noel Malcolm, si dhe Bethoveni dhe Revolucioni Francez e Fan Noli.
Kryeministri theksoi se arsimi cilësor mbetet forma më e lartë e patriotizmit, duke shtuar se institucionet publike dhe sistemi arsimor duhet të shfrytëzojnë potencialin e mërgatës shqiptare.
Sipas tij, në universitetet publike, institucionet shtetërore dhe në pesë gjimnazet e reja të specializuara që planifikohen të ndërtohen, synohet përfshirja e kuadrove profesionale nga diaspora.
“Forma më e lartë e patriotizmit është arsimi cilësor”, theksoi Kurti, duke nënvizuar se përfshirja e ekspertëve nga mërgata do të ndihmojë në forcimin e lidhjeve dhe sjelljen e përvojave profesionale në Kosovë.
