Kandidati i PDK-së për kryeministër, Bedri Hamza, ka reaguar lidhur me deklaratat e ish-ushtarit të UÇK-së, Isak Asllani, duke vlerësuar historinë dhe sakrificën e tij si një nga tragjeditë më të rënda të luftës në Kosovë.
Hamza tha se rrëfimi i Asllanit ngre pyetje të rëndësishme për gjendjen aktuale shoqërore dhe ndarjet që, sipas tij, janë krijuar ndër vite.
Sipas tij, historia e Isak Asllanit, i cili gjatë luftës humbi shtatë fëmijët, bashkëshorten dhe nënën, mbetet një dhimbje e jashtëzakonshme dhe një kujtesë për çmimin e lartë të lirisë.
“Kjo është një nga tragjeditë më të mëdha të luftës sonë. Dhimbje që nuk përshkruhet me fjalë”, tha Hamza.
Ai shtoi se në një kohë kur, sipas tij, ish-ushtarët dhe vlerat e luftës po përballen me sulme dhe gjuhë përçarëse, zërat si ai i Isak Asllanit duhet të kenë më shumë hapësirë në shoqëri.
Hamza vlerësoi gjithashtu faktin që, pavarësisht humbjeve të mëdha personale, Asllani vazhdon të flasë për Kosovën dhe të bëjë thirrje për unitet.
“Kosova është ndërtuar mbi sakrificë dhe bashkim, jo mbi urrejtje e përçarje. Për hir të këtyre sakrificave, e kemi për obligim t’i themi stop krizës dhe ta ndryshojmë Kosovën”, u shpreh ai.
Në fund të reagimit, Hamza shprehu respekt për Isak Asllanin dhe për të gjitha familjet që, sipas tij, sakrifikuan gjithçka për lirinë e vendit.
