Deputetja e Lidhja Demokratike e Kosovës, Hykmete N. Bajrami, ka reaguar ashpër ndaj vendimeve të fundit të Qeverisë për ndarjen e mjeteve buxhetore, duke i cilësuar ato si keqpërdorim të parasë publike në prag të zgjedhjeve.
Sipas saj, ndarja e rreth 100 milionë eurove javën e kaluar dhe 2 milionë eurove të tjera për bileta nuk lidhet me shqetësimin për qytetarët, por me interesin elektoral.
“Nuk po ndahen sepse Kurti brengoset për qytetarët, por sepse qytetarët votojnë më 7 qershor”, ka shkruar Bajrami.
Ajo ka pretenduar se këto mjete janë fonde që, sipas saj, duhej të ishin përdorur për projekte të tjera prioritare si infrastruktura rrugore, ndërtimi i shkollave dhe çerdheve, digjitalizimi i arsimit, furnizimi me barna dhe çështje të tjera publike.
Në reagimin e saj, Bajrami ka akuzuar qeverinë për tentim të ndikimit te votuesit përmes shpërndarjes së fondeve publike, duke e cilësuar situatën si “keqpërdorim të madh të buxhetit në prag të zgjedhjeve”.
Pretendimet e saj përbëjnë qëndrime politike dhe akuza publike, ndërsa vlerësimi për ligjshmërinë e vendimeve buxhetore i takon institucioneve përkatëse dhe mekanizmave mbikëqyrës.
