Pas katër ditësh garash intensive në zemër të kryeqytetit shqiptar, sot në Sheshin Skënderbej zhvillohet finalja e turneut prestigjioz ndërkombëtar të padelit, FIP Platinum Albania, që ka sjellë në Tiranë disa nga emrat më të njohur të këtij sporti në nivel botëror.
Turneu, i cili nisi më 26 maj, është pjesë e International Padel Federation dhe përfaqëson nivelin më të lartë të garave në kuadër të CUPRA FIP Tour.
Këto gara konsiderohen ndër ndalesat më prestigjioze të sezonit, me një fond shpërblimesh që varion nga 120 mijë deri në 150 mijë euro, ndërsa fituesit përfitojnë edhe 300 pikë të rëndësishme në renditjen ndërkombëtare.
Finalja e sotme pritet të tërheqë një numër të madh spektatorësh, pasi hyrja është falas për të gjithë vizitorët. Organizatorët synojnë ta shndërrojnë ngjarjen në një festë sportive në qendër të Tiranës, duke promovuar njëkohësisht padelin si një nga sportet me rritjen më të shpejtë në Evropë.
Edhe kryeministri i Shqipërisë, Edi Rama, ka promovuar turneun përmes rrjeteve sociale, duke publikuar fotografi nga aktiviteti dhe duke ftuar qytetarët të ndjekin finalen.
“Pas finales së madhe të UEFA Champions League, shijoni finalen e turneut ndërkombëtar të padelit, FIP Platinum Albania, sonte në Sheshin Skënderbej”, shkroi Rama në mesazhin e tij.
Me praninë e sportistëve të nivelit të lartë dhe atmosferën festive në qendër të kryeqytetit, finalja e FIP Platinum Albania pritet të jetë një nga ngjarjet sportive më të rëndësishme të fundjavës në Shqipëri.
