Të dielën në Kosovë pritet të mbajë mot i ngrohtë, me periudha të gjata me diell dhe vranësira lokale. Gjatë ditës, herë pas here, vranësirat mund të zhvillohen më fuqishëm duke krijuar kushte për rrebeshe të izoluara shiu, të shoqëruara me vetëtima dhe bubullimë.
Reshjet do të jenë të karakterit lokal dhe pritet të përfshijnë vetëm disa rajone të vendit, ndërsa pjesa më e madhe e territorit do të mbetet pa reshje dhe me mot të këndshëm.
Temperaturat minimale pritet të zbresin deri në 11°C, ndërsa ato maksimale do të arrijnë deri në 27°C. Në përgjithësi, dita do të karakterizohet nga mot i ngrohtë veror, me mundësi për zhvillime të izoluara atmosferike gjatë orëve të pasdites.
