Të paktën 10 persona kanë humbur jetën dhe dhjetëra të tjerë janë plagosur pas një vale të re sulmesh ajrore ruse që goditën disa qytete të Ukrainës gjatë natës, në atë që konsiderohet një nga ofensivat më të mëdha të Moskës në muajt e fundit.
Sipas autoriteteve ukrainase, gjashtë persona u vranë në qytetin e Dnipros, ndërsa katër viktima u regjistruan në Kiev, pas goditjeve me raketa dhe dronë ndaj zonave të banuara.
Ekipet e emergjencës vijojnë operacionet e kërkim-shpëtimit në kryeqytetin ukrainas, ku dyshohet se disa persona kanë mbetur të bllokuar nën rrënojat e ndërtesave të shembura.
Raketa balistike mbi Kiev
Alarmet për sulme ajrore u aktivizuan në pjesën më të madhe të territorit ukrainas në orët e para të mëngjesit. Kryebashkiaku i Kievit, Vitali Klitschko, u bëri thirrje banorëve të qëndrojnë në strehimore, ndërsa kreu i Administratës Ushtarake të qytetit, Tymur Tkachenko, deklaroi se forcat ruse po përdorin raketa balistike kundër kryeqytetit.
Pamjet e publikuara nga terreni tregojnë kolona të mëdha tymi mbi disa pjesë të Kievit, ndërsa autoritetet paralajmërojnë se bilanci i viktimave mund të rritet pasi operacionet e shpëtimit janë ende në zhvillim.
Rusia raporton sulm me dronë në Krasnodar
Ndërkohë, autoritetet ruse njoftuan për një sulm me dronë në rajonin e Krasnodar. Sipas qendrës së reagimit emergjent, një zjarr shpërtheu në rafinerinë e naftës Ilsky, por nuk janë raportuar viktima.
Përshkallëzim i tensioneve
Sulmet vijnë vetëm pak ditë pasi Moska paralajmëroi se do të ndërmerrte “goditje sistematike” ndaj Ukrainës. Paralajmërimi pasoi një sulm me dron në rajonin e pushtuar të Luhansk, ku sipas autoriteteve ruse mbetën të vrarë 21 persona.
Përshkallëzimi i fundit tregon se lufta mes Rusisë dhe Ukrainës vazhdon të hyjë në faza të reja intensifikimi, me sulme gjithnjë e më të mëdha ndaj infrastrukturës dhe zonave urbane në të dyja anët e konfliktit.
