Komisioni Qendror i Zgjedhjeve (KQZ) ka miratuar në mbledhjen e së martës Procedurën Standarde të Veprimit për aktivitetet në Qendrën e Numërimit dhe Rezultateve (QNR), si dhe Planin Operacional për organizimin e zgjedhjeve të parakohshme parlamentare të 7 qershorit 2026.
Sipas njoftimit të KQZ-së, procedura e re përcakton organizimin, funksionimin dhe përgjegjësitë e QNR-së gjatë administrimit të materialeve zgjedhore dhe procesit të numërimit të votave.
Dokumenti rregullon të gjitha fazat e procesit zgjedhor, duke përfshirë pranimin e materialeve nga Qendrat Komunale të Numërimit, votimin me kusht, votimin e personave me nevoja të veçanta, votimin nga jashtë Kosovës, si dhe proceset e numërimit, verifikimit, rinumërimit eventual, tabulimit dhe publikimit të rezultateve.
Po ashtu, procedura përcakton rregullat për transparencën e procesit, praninë e vëzhguesve të akredituar, trajtimin e ankesave, masat disiplinore në rast të shkeljeve dhe mbylljen përfundimtare të QNR-së pas përfundimit të të gjitha aktiviteteve zgjedhore.
Votim me dokumente të skaduara në diasporë
Në të njëjtën mbledhje, KQZ-ja mori vendim që qytetarëve të regjistruar për votim në përfaqësitë diplomatike të Kosovës jashtë vendit t’u lejohet votimi edhe me dokumente identifikimi të Republikës së Kosovës me afat të skaduar.
Sipas KQZ-së, vendimi është marrë pas evidentimit të rasteve gjatë zgjedhjeve të mëparshme parlamentare, kur votues të regjistruar në përfaqësitë diplomatike ishin paraqitur për të votuar me dokumente të skaduara.
Miratohet plani operacional për ditën e zgjedhjeve
Komisioni miratoi gjithashtu Planin Operacional për organizimin e zgjedhjeve të 7 qershorit 2026.
Ky dokument përcakton organizimin, koordinimin dhe përgjegjësitë e zyrtarëve të angazhuar në administrimin e procesit zgjedhor brenda dhe jashtë vendit.
Plani përfshin:
- Përgatitjen dhe funksionalizimin e qendrave të votimit;
- Shpërndarjen e materialeve zgjedhore;
- Komunikimin institucional;
- Raportimin e pjesëmarrjes dhe rezultateve preliminare;
- Menaxhimin e situatave operative gjatë ditës së zgjedhjeve.
Gjithashtu, dokumenti parasheh funksionimin e dhomave operative për koordinim dhe mbështetje, bashkëpunimin me institucionet përgjegjëse për sigurinë, energjinë elektrike dhe mbështetjen teknike, si dhe angazhimin e ekipeve për informimin e votuesve, komunikimin me mediat, logjistikën, teknologjinë informative dhe verifikimin e vëzhguesve.
Orari i konferencave për zgjedhjet në diasporë
Për procesin e votimit në përfaqësitë diplomatike më 6 qershor 2026, KQZ do të mbajë këto konferenca:
- 09:00 – Njoftimi për fillimin e votimit në përfaqësitë diplomatike;
- 14:00 – Raportim për pjesëmarrjen dhe ecurinë e procesit;
- 20:00 – Njoftim për mbylljen e votimit në përfaqësitë diplomatike në Evropë;
- 01:00 – Njoftim për media për përfundimin e votimit në të gjitha përfaqësitë diplomatike.
Pesë konferenca për ditën e zgjedhjeve në Kosovë
Më 7 qershor 2026, KQZ-ja do të mbajë pesë konferenca të rregullta për informimin e publikut:
- 08:00 – Njoftimi për fillimin e procesit të votimit;
- 11:30 – Raportim për pjesëmarrjen deri në orën 11:00 dhe ecurinë e procesit;
- 15:30 – Raportim për pjesëmarrjen deri në orën 15:00 dhe zhvillimet gjatë ditës;
- 19:30 – Njoftim për përfundimin e votimit, pjesëmarrjen e qytetarëve dhe fillimin e numërimit të fletëvotimeve;
- Konferenca e pestë – Publikimi i rezultateve të përmbledhura preliminare të subjekteve politike, për kohën e së cilës KQZ-ja do të njoftojë më vonë.
KQZ ka bërë të ditur se të gjitha këto masa synojnë garantimin e një procesi zgjedhor transparent, të rregullt dhe të besueshëm për qytetarët e Kosovës brenda dhe jashtë vendit.
