Sekretari amerikan i Shtetit, Marco Rubio, ka deklaruar se zgjerimi i NATO-s për të përfshirë Kosovën aktualisht nuk është në krye të agjendës së aleatëve, por ka lënë të hapur mundësinë që kjo të ndryshojë në të ardhmen.
Duke dëshmuar para Komitetit për Punë të Jashtme të Dhomës së Përfaqësuesve në Uashington, Rubio tha se nga bisedimet e fundit me ministrat e jashtëm të vendeve anëtare të NATO-s, aleanca është e fokusuar në çështje të tjera urgjente.
“Zgjerimi, veçanërisht në rastin e Kosovës, por edhe në raste të tjera, nuk është në krye të agjendës së këtyre vendeve”, u shpreh ai, duke shtuar se kjo “nuk do të thotë se nuk mund të ndodhë kurrë”.
Rubio u përgjigj edhe pyetjeve të kongresmenit Keith Self, i cili së fundmi ka vizituar Kosovën, Bosnje e Hercegovinën dhe Serbinë dhe e ka cilësuar situatën në Ballkanin Perëndimor si “jashtëzakonisht të brishtë”. Self kërkoi që SHBA të mbështesin më fuqishëm anëtarësimin e Kosovës në NATO, përfshirë edhe përmes ndikimit tek vendet anëtare që nuk e njohin pavarësinë e saj.
NATO e përqendruar në çështje të tjera
Rubio theksoi se, sipas tij, temat që lidhen me zgjerimin e aleancës nuk kanë qenë pjesë kryesore e diskutimeve të fundit brenda NATO-s.
“Kjo nuk ka pasur vend të rëndësishëm në bisedimet me aleatët tanë”, tha ai, duke shtuar se administrata amerikane mbetet e angazhuar në rajon, por prioritetet aktuale të aleancës janë të tjera.
Kosova vazhdon të synojë anëtarësimin në NATO dhe Bashkimin Evropian, por përballet me pengesa politike, përfshirë mosnjohjen nga disa shtete anëtare të aleancës.
Mbështetje për kandidatin italian në Bosnje e Hercegovinë
Gjatë seancës, Rubio foli edhe për situatën në Bosnje e Hercegovinë, duke konfirmuar mbështetjen e SHBA-së për kandidatin italian për postin e përfaqësuesit të lartë ndërkombëtar në vend.
Ai nuk e përmendi emrin e kandidatit, por tha se Uashingtoni beson se ai “do ta kryente mirë punën dhe do të ndihmonte në stabilitetin e vendit”.
Institucioni i përfaqësuesit të lartë në Bosnje e Hercegovinë ka rol mbikëqyrës në zbatimin e Marrëveshjes së Dejtonit dhe ka kompetenca të gjera ekzekutive në rast nevoje, përfshirë ndërhyrje në vendime politike dhe shkarkime zyrtarësh.
Rubio theksoi se SHBA-ja mbetet e angazhuar për të shmangur çdo përshkallëzim të mundshëm të tensioneve në Bosnje e Hercegovinë dhe në të gjithë Ballkanin Perëndimor.
