Qytetarët e Malit të Zi dyshohet se janë përballur me kufizime dhe kontrolle të shtuara në hyrje të Serbisë, në një zhvillim që vjen pas dëbimit të më shumë se 80 shtetasve serbë nga Aeroporti i Tivatit, për arsye të lidhura me sigurinë kombëtare.
Sipas raportimeve nga media “Vijesti” dhe burime nga sektori i sigurisë, që nga mbrëmja e 3 qershorit 2026, në disa pika kufitare mes dy vendeve – përfshirë Gostun, Jabuka dhe Dračenovac – nuk është lejuar kalimi i asnjë qytetari malazez për një periudhë të caktuar kohore.
Burime të cituara nga media thonë se autoritetet serbe kanë aplikuar kontrolle të intensifikuara, të cilat janë interpretuar nga disa si masë e përkohshme dhe e lidhur me zhvillimet e fundit në raportet dypalëshe.
“Policia po kryen kontrolle të shtuara dhe hyrja u lejohet vetëm atyre që nuk paraqesin rrezik për sigurinë”, ka deklaruar një burim jozyrtar, duke shtuar se masat janë përkohshme.
Sipas të njëjtave raportime, prezenca e shtuar policore në anën serbe të kufirit ka vështirësuar ndjeshëm qarkullimin, duke shkaktuar pritje dhe kufizime selektive për qytetarët malazezë.
Ndërkohë, policia kufitare e Malit të Zi ka deklaruar jozyrtarisht se bëhet fjalë për kontrolle të detajuara nga pala serbe dhe ka rekomanduar qytetarët të ndjekin në kohë reale gjendjen në pikat kufitare përmes kamerave dhe burimeve zyrtare të Ministrisë së Brendshme të Serbisë.
Zyrtarisht, asnjë nga institucionet e të dyja vendeve nuk ka dhënë ende një sqarim të plotë për natyrën dhe kohëzgjatjen e këtyre masave.
Ky zhvillim vjen në një moment të ndjeshëm politik mes Podgoricës dhe Beogradit, ku raportet shpesh janë shoqëruar me tensione të herëpashershme në çështje sigurie dhe reciprociteti kufitar.
