Ish-kryeministri i Kosovës, Avdullah Hoti, ka kritikuar ashpër qasjen e institucioneve për funksionalizimin e sigurimeve shëndetësore, duke e quajtur “propagandë” shpalljen e fundit për këtë proces.
Në një reagim publik, Hoti thotë se nuk përbën sukses fakti që po paraqitet si arritje themelimi i një strukture që, sipas tij, ekziston në ligj që nga viti 2014.
“Nuk është sukses të shpallësh themelimin e asaj që ekziston në ligj prej vitit 2014. Sukses do të ishte që qytetari të hynte në spital me kartelë sigurimi shëndetësor në dorë, e jo me kuletë në xhep”, ka deklaruar Hoti.
Ai thekson se Fondi i Sigurimit Shëndetësor është paraparë me ligj para më shumë se një dekade, por sipas tij ka mbetur i paimplementuar në praktikë.
“Pas pesë vitesh pushtet, sigurimi shëndetësor vazhdon të jetë premtim, jo realitet”, ka shtuar ai.
Hoti ka kërkuar sqarime nga qeveria për kohën kur pritet të fillojë funksionalizimi i plotë i sistemit, përfshirë pagesën e shërbimeve shëndetësore përmes fondit dhe mbulimin e barnave.
Sipas tij, nëse sigurimet shëndetësore do të ishin funksionale, kjo do të përkthehej në një përfitim financiar të konsiderueshëm për qytetarët, duke e krahasuar me rreth 100 euro në muaj për familje.
Deklarata e Hotit vjen në një moment kur çështja e reformës në shëndetësi dhe financimi i shërbimeve publike mbetet një nga temat më të diskutuara në vend.
