Procesi i votimit në përfaqësitë diplomatike të Republikës së Kosovës po zhvillohet sipas planifikimit në të gjitha misionet diplomatike, ndërsa deri në orën 13:00 kanë votuar 10,804 shtetas të regjistruar, ka njoftuar Komisioni Qendror i Zgjedhjeve.
Në konferencën e dytë për media, zëdhënësi i KQZ-së, Valmir Elezi, bëri të ditur se me hapjen e vendvotimeve në Shtetet e Bashkuara të Amerikës dhe në Kanada, procesi i votimit tashmë është aktiv në të gjitha përfaqësitë diplomatike të Kosovës.
“Me fillimin e votimit në përfaqësitë diplomatike në Shtetet e Bashkuara të Amerikës dhe në Kanada, në orën 13:00 sipas kohës lokale në Kosovë, ju njoftojmë se tashmë procesi i votimit është duke vazhduar në të gjitha përfaqësitë diplomatike të Republikës së Kosovës”, deklaroi Elezi.
Sipas të dhënave të prezantuara nga KQZ-ja, pjesëmarrja e votuesve deri në këtë orë ka arritur në afro 39 për qind.
“Nga 27,724 votues të regjistruar në 26 përfaqësi diplomatike, deri në orën 13:00 kanë votuar 10,804 qytetarë, që përbën 38.97 për qind të numrit të përgjithshëm të votuesve të regjistruar”, tha Elezi.
Procesi i votimit në misionet diplomatike pritet të vazhdojë gjatë ditës, ndërsa KQZ-ja do të publikojë të dhëna të tjera për pjesëmarrjen në orët në vijim.