Çmimi i naftës në Kosovë të martën ka shënuar një rënie të lehtë prej vetëm 1 cent krahasuar me një ditë më parë, ndonëse në tregjet ndërkombëtare është regjistruar një ulje më e theksuar pas zhvillimeve gjeopolitike dhe marrëveshjes SHBA–Iran.
Sipas çmimit tavan të vendosur nga Ministria e Industrisë, Ndërmarrësisë, Tregtisë dhe Inovacionit, një litër naftë të martën është shitur me 1.49 euro, nga 1.50 euro sa ishte të hënën.
Ndërkohë, çmimet e benzinës dhe gazit nuk kanë ndryshuar. Një litër benzinë vazhdon të shitet me 1.39 euro, ndërsa gazi me 0.67 euro për litër.
Në tregjet globale, çmimet e naftës kanë pësuar rënie rreth 5 për qind, pas zhvillimeve që lidhen me marrëveshjen SHBA–Iran dhe lehtësimit të tensioneve në Lindjen e Mesme, që kanë ndikuar në pritjet për furnizim më stabil me naftë.
Nafta Brent, standardi ndërkombëtar i referencës, ka rënë në 83.55 dollarë për fuçi, ndërsa nafta amerikane në 80.74 dollarë për fuçi.
Rënia e çmimeve vjen pas rritjeve të mëparshme të shkaktuara nga tensionet ushtarake dhe shqetësimet për bllokimin e Ngushticës së Hormuzit, përmes së cilës kalon rreth 20 për qind e tregtisë globale të naftës.
