Komisioni Qendror i Zgjedhjeve po vazhdon procesin e numërimit të votave me post për zgjedhjet e parakohshme parlamentare, ndërsa deri tani janë numëruar mbi 96 për qind e tyre.
Sipas rezultateve aktuale, Lëvizja VETËVENDOSJE! ka arritur të sigurojë edhe mandatin e 53-të në Kuvendi i Republikës së Kosovës, duke forcuar më tej pozitën si subjekti i parë politik në vend.
Ky ndryshim ka ndikuar drejtpërdrejt te Lidhja Demokratike e Kosovës, e cila bie nga 19 në 18 deputetë. Si pasojë, kandidatja e LDK-së, Jeta Statovci, mbetet jashtë Kuvendit dhe humb mandatin e deputetes.
Zhvillimi i fundit pritet të ketë peshë edhe në kalkulimet politike për konstituimin e Kuvendit. Megjithëse LVV-ja ka fituar një ulëse shtesë, ajo ende mbetet larg shumicës absolute prej 61 votash, e nevojshme për zgjedhjen e kryetarit të Kuvendit dhe formimin e qeverisë.
Procesi i numërimit të votave me post pritet të përfundojë nesër, ndërsa më pas Komisioni Qendror i Zgjedhjeve do të nisë edhe numërimin e votave me kusht, të cilat mund të sjellin lëvizje të tjera në ndarjen finale të mandateve.
Në një situatë ku Kuvendi tashmë po përballet me ngërç politik, çdo mandat po del vendimtar për balancat mes partive dhe për mundësinë e krijimit të institucioneve të reja.
