Deputeti i Partia Demokratike e Kosovës, Bekim Haxhiu, ka bërë të ditur se ka paraqitur ankesë në Paneli Zgjedhor për Ankesa dhe Parashtresa (PZAP), duke kërkuar rinumërimin e plotë të votave të kandidatëve për deputet nga PDK.
Sipas Haxhiut, kërkesa e tij nuk bazohet në pakënaqësi ndaj rezultatit zgjedhor, por në fakte që, sipas tij, janë konfirmuar nga vetë procesi i rinumërimit i zhvilluar nga Komisioni Qendror i Zgjedhjeve (KQZ).
Ai theksoi se rinumërimi i 185 vendvotimeve, që përfaqësojnë rreth 3.52% të votave të PDK-së, ka nxjerrë në pah pasaktësi në numërimin fillestar. Sipas tij, vetëm nga kjo mostër e kufizuar atij i janë shtuar 6 vota që nuk ishin regjistruar më parë.
Haxhiu argumenton se, kur diferenca mes kandidatëve është vetëm 102 vota, çdo votë mund të ndikojë drejtpërdrejt në rezultatin përfundimtar.
Për këtë arsye, ai ka kërkuar që të rinumërohen të gjitha votat e kandidatëve të PDK-së që nuk janë përfshirë në procesin e deritanishëm të rinumërimit, duke vlerësuar se vetëm një verifikim i plotë mund të garantojë drejtësi dhe saktësi në ndarjen e mandateve parlamentare.
Ai shtoi se besimi në procesin zgjedhor ndërtohet mbi transparencën, ligjshmërinë dhe respektimin e vullnetit qytetar, duke kërkuar nga PZAP një shqyrtim të paanshëm të ankesës.
Në reagimin e tij, Haxhiu rikujtoi edhe procesin zgjedhor të kaluar, ku pretendon se kishte identifikuar parregullsi dhe manipulime, duke theksuar se edhe zgjedhjet e këtij viti, sipas tij, kanë shfaqur deformime që duhen adresuar.
