Kryeministri i Shqipërisë, Edi Rama, ka reaguar pas deklaratave të aktivistit Arben Kola, i cili gjatë një proteste pretendoi se mes protestuesve veprojnë grupe të infiltruara serbe, greke dhe iraniane që punojnë kundër interesave të Shqipërisë.
Në një reagim në rrjetet sociale, Rama la të kuptohet se me kalimin e kohës do të zbardhen më shumë prapaskena lidhur me këto zhvillime.
“Ouuu… Po ky vetë?! Avash-avash, të gjithë do dalin! Dhe flamingot do habiten me veten e tyre si ranë me kokë mes korbave e sorrave të shqiptarisë së rreme”, ka shkruar Rama.
Deklarata e kryeministrit vjen pas komenteve të forta të Kolës, i cili pretendoi se brenda protestave ka elementë të infiltruar nga qarqe të huaja, përfshirë grupe serbe, greke dhe iraniane, me qëllim destabilizimin dhe dëmtimin e interesave kombëtare.
Ndërkohë, Kola është distancuar edhe nga incidenti i përdhosjes së flamurit izraelit gjatë protestës, duke theksuar se ai dhe mbështetësit e tij nuk kanë lidhje me akte të tilla.
Reagimi i Ramës ka nxitur debat të gjerë në opinionin publik dhe në rrjetet sociale, ku deklaratat e fundit po interpretohen si një përplasje e re mes qeverisë dhe grupeve aktiviste që kundërshtojnë politikat aktuale.
