Ka nisur ekzekutimi i pagesave prej 100 eurosh për studentët përfitues në kuadër të Pakos për Përballje me Inflacionin 2.0, ka bërë të ditur ministri në detyrë i Financave, Hekuran Murati.
Sipas njoftimit të tij, pagesat kanë filluar të transferohen në llogaritë e studentëve pas përfundimit të procesit të verifikimit nga institucionet e arsimit të lartë.
“Sot është bërë ekzekutimi i pagesave për studentët përfitues në kuadër të Pakos për Përballje me Inflacionin 2.0,” ka shkruar Murati.
Ai bëri të ditur se, pas pranimit të verifikimeve të nevojshme nga universitetet dhe institucionet e tjera të arsimit të lartë, komisioni verifikues ka finalizuar listën e studentëve që janë kualifikuar për mbështetjen e njëhershme financiare.
Mbështetja prej 100 eurosh synon të ndihmojë studentët në përballimin e kostove të rritura të jetesës, si pjesë e masave qeveritare kundër ndikimit të inflacionit në Kosovë.
