Kryetari i Prishtinës, Përparim Rama, ka njoftuar përfundimin e ndërtimit të rrethit në hyrje të kryeqytetit nga drejtimi i Gjilanit, duke e cilësuar këtë si një projekt të rëndësishëm për lehtësimin e trafikut dhe përmirësimin e qasjes në qytet.
Përmes një postimi në rrjetet sociale, Rama theksoi se ky projekt ishte përgjegjësi e Qeverisë, pasi bëhet fjalë për një segment të rrugës magjistrale. Megjithatë, sipas tij, për shkak të mungesës së veprimit nga institucionet qendrore, Komuna e Prishtinës vendosi ta marrë vetë përsipër realizimin e tij.
“Meqë tash e 6 vjet kjo qeveri është marrë me përralla e ofendime e jo me punë, ne si Kryeqytet e kemi kry vet këtë projekt, që me lehtësu trafikun dhe qasjen për qytetarët e Prishtinës, e sidomos atyre që vijnë nga Gjilani”, ka deklaruar Rama.
Ai shtoi se rrethi i ri pritet të ndikojë ndjeshëm në përmirësimin e qarkullimit në një nga hyrjet më të frekuentuara të kryeqytetit, duke reduktuar kolonat dhe duke rritur sigurinë në komunikacion.
Po ashtu, Rama ka paralajmëruar se në ditët në vijim do të hapet për qarkullim edhe “Rruga A”, ndërsa shumë shpejt pritet të nisin edhe punimet për projektin e “Penetrimit të Veternikut”, një tjetër investim i rëndësishëm infrastrukturor për Prishtina.
