Ministrja në detyrë e Mjedisit, Planifikimit Hapësinor dhe Infrastrukturës, Fitore Pacolli, ka njoftuar se ka nisur zyrtarisht pranimi i mbeturinave nga qytetarët në katër deponitë sanitare të Kompania për Menaxhimin e Deponive në Kosovë.
Sipas saj, qytetarët tashmë mund t’i dërgojnë mbeturinat në deponitë sanitare të Mirashit, Landovicës, Velekincës dhe Dumnicës, duke pasur në dispozicion hapësira të ligjshme dhe të sigurta për depozitimin e tyre.
Pacolli bëri të ditur se këto deponi do të jenë të hapura çdo të shtunë nga ora 08:00 deri në 16:00, ekskluzivisht për pranimin e mbeturinave nga qytetarët.
Ajo theksoi se me ofrimin e këtij shërbimi nuk duhet të ketë më arsye për hedhjen e mbeturinave në natyrë apo në deponi ilegale.
Ministrja u bëri thirrje qytetarëve që të kontribuojnë aktivisht në mbrojtjen e mjedisit dhe ta shfrytëzojnë këtë mundësi për menaxhim të përgjegjshëm të mbeturinave.
“Të gjithë kemi për detyrë që ambientin ta ruajmë dhe Kosovo ta bëjmë më të pastër e më të gjelbër”, ka deklaruar Pacolli.
