Komandanti i Forca e Sigurisë së Kosovës, Gjenerallejtënant Bashkim Jashari, ka marrë pjesë në ceremoninë e dorëzimit të komandës së Ushtrisë Amerikane për Evropë dhe Afrikë (USAREUR-AF), me ftesë të Komandantit Suprem të Forcave Aleate në Evropë (SACEUR) dhe Komandantit të Komandës Evropiane të SHBA-së (EUCOM), Gjeneral Alexus G. Grynkewich.
Në kuadër të ceremonisë së ndërrimit të komandës nga Gjeneral Christopher T. Donahue, komandanti Jashari shprehu vlerësimin e lartë për lidershipin dhe kontributin e tij në drejtimin e kësaj komande me rëndësi strategjike për Evropën.
Ai falënderoi gjeneralin Donahue për mbështetjen e vazhdueshme ndaj zhvillimit dhe ngritjes së kapaciteteve të FSK-së, si dhe për kontributin në forcimin e bashkëpunimit ndërmjet dy forcave.
Nga ana tjetër, gjeneral Donahue falënderoi Jasharin për pjesëmarrjen në ceremoni dhe vlerësoi bashkëpunimin e ngushtë e të suksesshëm me FSK-në, me theks të veçantë në zgjerimin e aktiviteteve të përbashkëta, përfshirë trajnimet dhe ushtrimet ushtarake që kanë rritur ndërveprueshmërinë mes forcave.
Gjatë ceremonisë, komandanti i FSK-së zhvilloi takime edhe me homologë të vendeve partnere të NATO. Po ashtu, ai u takua edhe me zëvendëskomandantin dhe ushtruesin e detyrës së komandantit të USAREUR-AF, Gjeneralmajor Christopher Norrie, me të cilin u dakordua për vazhdimin e bashkëpunimit dhe aktiviteteve të përbashkëta.
Në përmbyllje, palët rikonfirmuan përkushtimin për thellimin e partneritetit strategjik ndërmjet FSK-së dhe USAREUR-AF, duke theksuar se zhvillimi i kapaciteteve mbrojtëse mbetet kyç për forcimin e sigurisë, ruajtjen e stabilitetit dhe promovimin e paqes së qëndrueshme në Kosovë dhe rajon.
