Presidenti i Turqisë, Recep Tayyip Erdoğan, ka pritur në Kompleksin Presidencial në Ankara sekretarin e përgjithshëm të NATO-s, Mark Rutte, në prag të Samitit të Aleancës që nis më 7 korrik.
Sipas Drejtorisë së Komunikimeve të Presidencës turke, takimi u zhvillua menjëherë pas mbërritjes së Rutte në Ankara dhe u përqendrua në agjendën e samitit, si dhe në zhvillimet më të fundit rajonale dhe globale.
Erdogan shprehu besimin se samiti i organizuar nga Turqia do të përfundojë me rezultate pozitive, duke theksuar se Ankaraja ka përfunduar të gjitha përgatitjet për mikpritjen e liderëve të vendeve aleate.
Presidenti turk nënvizoi se samiti duhet të trajtojë një gamë të gjerë çështjesh, duke filluar nga forcimi i mbrojtjes kolektive e deri te zgjerimi i bashkëpunimit në industrinë e mbrojtjes mes vendeve anëtare të NATO-s.
Ai vlerësoi gjithashtu rëndësinë e Forumit të Industrisë së Mbrojtjes, i cili do të zhvillohet në kuadër të samitit, duke theksuar se pritet të tërheqë vëmendje të veçantë për shkak të rolit në forcimin e bashkëpunimit teknologjik dhe industrial mes aleatëve.
