Kryeministri i Izraelit, Benjamin Netanyahu, i ka kërkuar presidentit amerikan Donald Trump të mos miratojë furnizimin e Turqisë me avionë luftarakë Lockheed Martin F-35 Lightning II dhe pajisje të tjera ushtarake, duke argumentuar se kjo do të cenonte ekuilibrin strategjik në Lindjen e Mesme.
Sipas raportimeve, Netanyahu ka shprehur shqetësimin për retorikën e presidentit turk Recep Tayyip Erdoğan ndaj Izraelit, ndërsa Trump pritet të zhvillojë një takim me Erdoganin në kuadër të Samitit të NATO-s në Ankara.
Në qendër të diskutimeve mes Uashingtonit dhe Ankarasë është një marrëveshje me vlerë rreth 700 milionë dollarë për furnizimin e Turqisë me motorë të rinj për avionët luftarakë, si dhe mundësia e rikthimit të saj në programin F-35, nga i cili u përjashtua në vitin 2019 pas blerjes së sistemit rus të mbrojtjes ajrore S-400.
Javën e kaluar, zëvendëspresidenti amerikan JD Vance deklaroi se Pentagoni po shqyrton mundësitë për shitjen e avionëve F-35 Turqisë, pavarësisht posedimit të sistemit S-400.
Në një intervistë për Fox News, Netanyahu kritikoi ashpër Erdoganin, duke pretenduar se Turqia mbështet forca që, sipas tij, rrezikojnë stabilitetin rajonal.
“Nuk besoj se një regjimi të ndikuar nga Vëllazëria Myslimane duhet t’i jepen avionët F-35 apo motorë për avionët luftarakë, sepse kjo do të ndryshonte ekuilibrin e fuqisë në Lindjen e Mesme, i garantuar nga epërsia ajrore e Izraelit dhe prania strategjike e Amerikës”, deklaroi Netanyahu.
Bisedime Izrael-Liban në Romë
Ndërkohë, ambasadori izraelit në SHBA, Yechiel Leiter, bëri të ditur se raundi i ardhshëm i bisedimeve mes Izraelit dhe Libanit do të zhvillohet më 15 dhe 16 korrik në Romë, në nivel ambasadorësh.
Sipas tij, presidenti i Libanit, Joseph Aoun, pritet gjithashtu të zhvillojë një takim me presidentin amerikan Donald Trump më 21 korrik, në kuadër të përpjekjeve diplomatike për uljen e tensioneve në rajon.
