Komisioni Qendror i Zgjedhjeve pritet të certifikojë sot, në mbledhjen e caktuar për orën 11:00, rezultatet përfundimtare të zgjedhjeve parlamentare të 7 qershorit, duke përmbyllur zyrtarisht procesin zgjedhor.
Certifikimi vjen pasi Gjykata Supreme e Kosovës hodhi poshtë si të pabazuara pesë ankesat e paraqitura kundër rezultateve përfundimtare, duke konfirmuar vendimet e Paneli Zgjedhor për Ankesa dhe Parashtresa.
Ankesat ishin paraqitur nga Lista Serbe, Nova Demokratska Stranka, si dhe nga kandidatët e Partia Demokratike e Kosovës, Bekim Haxhiu dhe Qëndrim Kryeziu.
Supremja: Nuk ka prova për manipulime
Lista Serbe pretendonte se subjekti politik i Nenad Rashiq kishte marrë vota në zona ku jetojnë pak ose aspak qytetarë serbë, duke kërkuar anulimin e tyre. Megjithatë, Gjykata Supreme vlerësoi se ky pretendim është i pabazuar dhe theksoi se mandati i fituar mbetet brenda përfaqësimit të komunitetit serb.
Po ashtu, Gjykata rrëzoi edhe pretendimet e NDS-së ndaj Koalicionit Vakat, duke theksuar se përkatësia etnike e votuesve nuk mund të përdoret si kriter për vlerësimin e ligjshmërisë së votimit.
Ndërkohë, kërkesat e Bekim Haxhiut dhe Qëndrim Kryeziut për rinumërimin e të gjitha votave preferenciale të PDK-së u refuzuan, pasi Supremja konstatoi se rinumërimi i mbi 7 për qind të votave kishte nxjerrë vetëm dallime të vogla, të cilat lidhen me gabime njerëzore dhe rikategorizimin e fletëvotimeve, pa ndikuar në rezultatin përfundimtar.
Nis afati kushtetues për Kuvendin
Me certifikimin e rezultateve nga KQZ-ja, nis edhe afati kushtetues prej 30 ditësh për thirrjen dhe mbajtjen e seancës konstituive të Kuvendi i Kosovës.
Në këtë periudhë, deputetët e zgjedhur duhet të mblidhen për konstituimin e legjislaturës së re, proces që përfshin verifikimin e mandateve, betimin e deputetëve dhe zgjedhjen e kryetarit dhe nënkryetarëve të Kuvendit, duke hapur më pas rrugën për formimin e institucioneve të reja të vendit.
