Presidenti i Ukrainës, Volodymyr Zelensky, ka njoftuar se vendi i tij është pranë arritjes së një marrëveshjeje historike për prodhimin e raketave për sistemin Patriot, duke theksuar se ato së shpejti do të mbajnë etiketën “Prodhuar në Ukrainë”.
Gjatë një konference të përbashkët me presidenten e Komisionit Evropian, Ursula von der Leyen, e cila vizitoi Kievin këtë të mërkurë, Zelensky tha se Ukraina do të bëhet shteti i tretë në histori që fiton të drejtën për të prodhuar raketa për sistemin Patriot.
“Për herë të parë, Ukraina po i afrohet mundësisë për të prodhuar raketa për sistemin Patriot. Kjo është një arritje strategjike që do të ndihmojë në shpëtimin e mijëra jetëve”, deklaroi Zelensky, duke falënderuar presidentin e Shteteve të Bashkuara për vendimin politik që mundësoi këtë proces.
Ai bëri të ditur gjithashtu se Ukraina dhe Bashkimi Evropian do të ndërtojnë së bashku një mburojë antiraketore, duke e cilësuar këtë si një hap të rëndësishëm për forcimin e sigurisë së Evropës.
Ndërkohë, situata në terren mbetet e tensionuar. Autoritetet ukrainase raportuan se sulmet ruse ndaj një anijeje tregtare në jug të vendit dhe dy anijeve të tjera në Detin e Zi kanë lënë të vdekur tre persona. Po ashtu, pesë persona u plagosën pas një sulmi ajror rus në rajonin e Sumyt.
Në zhvillime të tjera, centrali bërthamor i Zaporizhzhias pësoi një ndërprerje të furnizimit me energji elektrike, duke detyruar autoritetet të aktivizojnë gjeneratorët me naftë për të garantuar funksionimin e sistemeve kritike të sigurisë.
