Qeveria në detyrë e Republikës së Kosovës ka mbajtur mbrëmë mbledhjen e saj të 28-të në format elektronik, ku ka miratuar disa vendime që lidhen me emërime, shpronësime për interes publik dhe ndryshime në përbërjen e një komisioni qeveritar.
Në kuadër të vendimeve të marra, Qeveria ka emëruar Ragmi Dalipin në pozitën e Drejtorit të Përgjithshëm të Agjencisë së Shoqërisë së Informacionit (ASHI).
Po ashtu, është miratuar vendimi përfundimtar për shpronësimin për interes publik të pronave të paluajtshme ish-shoqërore, të menaxhuara nga Agjencia Kosovare e Privatizimit (AKP), të nevojshme për realizimin e dy projekteve të Komunës së Gjakovës:
- Administrimin e objektit të ish-“Bankos”-it për nevojat e administratës komunale në zonën Gjakovë-Qytet;
- Ndërtimin e një fushe futbolli dhe hapësirave rekreative për fshatin Trakaniq dhe fshatrat përreth në Zonën Kadastrale Trakaniq.
Gjithashtu, kabineti qeveritar ka miratuar ndryshimin dhe plotësimin e Vendimit Nr. 11/08, të datës 3 prill 2026, për emërimin e Komisionit për shqyrtimin dhe vendosjen e zyrtarizimit të gjendjes faktike dhe mospërputhjeve me Regjistrin e të Drejtave të Pronës së Paluajtshme.
Me këtë vendim, Besnike Mehmeti nga Zyra e Kryeministrit është emëruar zëvendësuese e anëtarit të komisionit, duke zëvendësuar Ervina Gashin.
