Ministrja në detyrë e Mjedisit, Planifikimit Hapësinor dhe Infrastrukturës, Fitore Pacolli, ka njoftuar miratimin e një vendimi të ri që vendos standarde të detyrueshme për mbrojtjen e mjedisit gjatë organizimit të festivaleve, koncerteve dhe aktiviteteve të tjera publike në Kosovë.
Sipas Pacollit, vendimi përcakton rregulla të qarta që çdo organizator duhet t’i zbatojë për të minimizuar ndikimin në mjedis.
Organizatorët do të jenë të obliguar të sigurojnë:
- menaxhimin e duhur të mbeturinave;
- pastrimin e plotë të hapësirave pas përfundimit të aktivitetit;
- respektimin e kufijve të lejuar të zhurmës;
- mbrojtjen e ajrit, ujit dhe natyrës gjatë zhvillimit të ngjarjeve.
Për aktivitetet që konsiderohen me ndikim më të madh në mjedis, komunat do të kenë të drejtë të kërkojnë edhe garanci financiare për rehabilitimin e hapësirës pas përfundimit të tyre.
Pacolli e cilësoi vendimin si një standard të ri të përgjegjësisë mjedisore në Kosovë, duke theksuar se zhvillimi i jetës kulturore dhe organizimi i aktiviteteve publike duhet të shkojnë paralelisht me mbrojtjen e mjedisit.
Ajo paralajmëroi se institucionet do të jenë të pakompromis në zbatimin e këtyre masave, duke nënvizuar se ruajtja e një mjedisi të pastër është përgjegjësi e përbashkët dhe detyrim ndaj brezave të ardhshëm.
