Senati i Shteteve të Bashkuara ka miratuar një rezolutë procedurale që i hap rrugën votimit në grup të 74 emërimeve të propozuara nga administrata e presidentit Donald Trump. Në mesin e tyre është edhe kandidatura e Eric Wendt për postin e ambasadorit të SHBA-së në Shqipëri.
Sipas Komitetit për Marrëdhëniet me Jashtë të Senatit, rezoluta mundëson shqyrtimin e një pakete të gjerë emërimesh përmes një procedure të përshpejtuar, duke shmangur votimet individuale për secilin kandidat.
Ky është grupi i pestë i emërimeve civile që trajtohet sipas rregullave të reja të miratuara nga republikanët në Senat, të cilat synojnë të shpejtojnë procesin e konfirmimit të zyrtarëve të administratës.
Paketa përfshin gjithsej 74 kandidatura, mes tyre:
- 17 ambasadorë;
- 4 prokurorë federalë;
- 4 marshallë federalë;
- zëvendëssekretarë dhe ndihmëssekretarë në departamente të ndryshme;
- drejtues të institucioneve federale, përfshirë FEMA dhe TSA.
Në këtë listë bën pjesë edhe kandidatura e Eric Wendt, i propozuar për ambasador të SHBA-së në Tiranë. Pas miratimit të procedurës, kandidatura e tij pritet të dalë për votimin përfundimtar në Senat, i cili do të përcaktojë zyrtarisht konfirmimin e tij në detyrë.
Nëse miratohet, Wendt do të marrë drejtimin e Ambasadës së Shteteve të Bashkuara në Shqipëri, në një periudhë kur marrëdhëniet mes Uashingtonit dhe Tiranës mbeten të fokusuara te bashkëpunimi në fushën e sigurisë, mbrojtjes, reformës në drejtësi dhe integrimit euroatlantik.
