Prokuroria Speciale e Republikës së Kosovës ka ngritur aktakuzë, me propozim për zhvillimin e gjykimit në mungesë, ndaj 20 personave të dyshuar për kryerjen e veprës penale “Krime lufte kundër popullsisë civile” gjatë luftës në Kosovë, në Komunën e Gjakovës.
Sipas njoftimit të Prokurorisë, të pandehurit M.K., R.Ç., M.D., P.R., S.K., L.O., Zh.S., S.S., L.D., Z.R., D.G., Ç.B., V.B., R.B., R.R., L.R., M.Sh., M.R., S.G. dhe T.A. akuzohen për pjesëmarrje në një operacion të gjerë ushtarako-policor të zhvilluar gjatë viteve 1998–1999.
Aktakuza thotë se M.K., në cilësinë e shefit të Sekretariatit të Punëve të Brendshme (SUP) në Gjakovë, R.Ç., si komandant i njësive të Policisë së Posaçme (PJP), dhe M.D., si komandant i Brigadës së 52-të të Artilerisë Raketore, së bashku me të pandehurit e tjerë, dyshohen se kanë marrë pjesë në vrasjen e 107 civilëve.
Sipas Prokurorisë Speciale, gjatë operacionit forcat serbe fillimisht kanë ndarë gratë dhe fëmijët nga burrat.
Në aktakuzë thuhet se gratë janë plaçkitur, duke iu marrë stolitë e arit, paratë dhe sendet e tjera me vlerë, ndërsa burrat janë ekzekutuar në shtëpitë dhe oborret e tyre, si dhe në lokacionin e njohur si “Ura e Taliqit”.
Prokuroria pretendon gjithashtu se gjatë operacionit janë djegur edhe shtëpi të civilëve, duke shkaktuar pasoja të rënda materiale dhe njerëzore.
Rasti pritet të trajtohet nga gjykata kompetente, ndërsa Prokuroria ka kërkuar që procesi gjyqësor të zhvillohet në mungesë të të akuzuarve, në përputhje me dispozitat ligjore në fuqi.
