Kryetari i Partisë Demokratike të Kosovës (PDK), Bedri Hamza, ka deklaruar pas mbledhjes së Kryesisë së partisë se kryeministri në detyrë, Albin Kurti, sipas tij, nuk po tregon vullnet për t’i dhënë Kosovës institucione të reja.
Hamza tha se nuk ka marrë ftesë për takim nga Kurti dhe se, sipas tij, një takim i tillë nuk është i nevojshëm, pasi PDK-ja e ka bërë tashmë të qartë qëndrimin e saj.
“Nuk ka qëndrim serioz dhe nuk ka qëllim me i dhënë vendit institucione”, deklaroi Hamza.
Ai e akuzoi Kurtin për mosrespektim të Kushtetutës dhe të një aktgjykimi të Gjykatës Kushtetuese lidhur me konstituimin e Kuvendit pas certifikimit të rezultateve zgjedhore.
Sipas Hamzës, situata është “më shumë se serioze”, pasi, në vlerësimin e tij, mosrespektimi i Kushtetutës dhe i vendimeve të Gjykatës Kushtetuese cenon rendin demokratik dhe institucional të vendit.
Kreu i PDK-së paralajmëroi se partia e tij po diskuton veprimet e ardhshme dhe se ato do të jenë ligjore, kushtetuese dhe demokratike, me qëllim mbrojtjen e rendit kushtetues dhe institucioneve të Kosovës.
Hamza: Do të veprojmë sipas interesit të Republikës
I pyetur nëse deputetët e PDK-së do të marrin pjesë në rast se thirret seanca konstituive në ditët në vijim, Hamza tha se deputetët do të veprojnë në përputhje me interesat e Republikës së Kosovës.
Ai iu referua edhe incidenteve të mëparshme politike, duke kritikuar atë që e konsideroi standard të dyfishtë në interpretimin e veprimeve politike.
Hamza tha se PDK-ja do të vazhdojë ta trajtojë situatën me seriozitet dhe përgjegjësi, duke vënë në fokus Kushtetutën, rendin kushtetues dhe funksionimin e institucioneve shtetërore.
Përplasja politike mes PDK-së dhe LVV-së vjen në një periudhë të ndjeshme për konstituimin e institucioneve të reja të Kosovës, ndërsa partitë opozitare po kërkojnë respektimin e procedurave kushtetuese dhe zhbllokimin e procesit institucional.
