Kryeministri në detyrë i Republikës së Kosovës, Albin Kurti, mori pjesë në hapjen e Konferencës së 9-të të Ambasadorëve, e cila këtë vit zhvillohet me temën “Kosova në një botë në ndryshim: Siguri, partneritet dhe zhvillim”.
Konferenca, e organizuar nga Ministria e Punëve të Jashtme dhe Diasporës, mbledh përfaqësuesit diplomatikë të Kosovës nga vende të ndryshme të botës dhe synon të përcaktojë prioritetet e diplomacisë kosovare në një periudhë të karakterizuar nga ndryshime të shpejta gjeopolitike.
Kurti falënderoi ambasadorët për angazhimin e tyre dhe theksoi se diplomacia e Kosovës duhet të shkojë përtej marrëdhënieve tradicionale ndërmjet shteteve.
Sipas tij, ambasadorët duhet të forcojnë bashkëpunimin edhe me universitetet, mediat, bizneset, shoqërinë civile dhe qytetarët, duke përdorur diplomacinë publike dhe komunikimin digjital për promovimin e interesave të Kosovës.
“Angazhimi përtej marrëdhënieve tradicionale shtet me shtet imponon më shumë se sa përfaqësim formal; ai kërkon punë të vazhdueshme për të krijuar kontakte, për të ndërtuar partneritete dhe për të hapur mundësi të reja për vendin”, deklaroi Kurti.
Kurti përmend njohjet dhe avancimin ndërkombëtar
Në fjalimin e tij, kryeministri në detyrë veçoi zhvillimet në politikën e jashtme, duke thënë se gjatë vitit 2025 Kosova ka marrë njohje nga Kenia, Sudani, Siria dhe Bahamet.
Ai përmendi gjithashtu avancimin e Kosovës në proceset ndërkombëtare, përfshirë Këshillin e Evropës, Asamblenë Parlamentare të NATO-s dhe aplikimin për anëtarësim në Bashkimin Evropian.
Sipas Kurtit, Kosova është anëtarësuar ndërkohë në 15 organizata ndërkombëtare, ndërsa pasaporta e Kosovës, sipas renditjes së përmendur prej tij, në vitin 2026 është ngjitur në vendin e 57-të, nga vendi i 108-të në vitin 2021.
Ai tha gjithashtu se Kosova nuk figuron më në listat e vendeve të konsideruara të brishta dhe të cenueshme, duke e paraqitur këtë si tregues të forcimit të institucioneve dhe të besimit ndërkombëtar ndaj vendit.
Ekonomia dhe investimet në fokus
Kurti foli edhe për zhvillimet ekonomike. Sipas tij, bazuar në të dhënat e Fondit Monetar Ndërkombëtar, Kosova pritet të ketë rritje ekonomike prej rreth 4 për qind, duke e renditur ndër ekonomitë me rritjen më të shpejtë në Evropë.
Ai tha se eksportet janë dyfishuar dhe raporti eksport–import është përmirësuar nga 1:9 në 1:6.
Një tjetër pikë e theksuar ishte investimi i huaj. Sipas Kurtit, gjatë vitit të kaluar investimet e huaja direkte kanë kaluar për herë të parë 1 miliard euro, ndërsa janë rritur edhe të hyrat buxhetore dhe shpenzimet kapitale.
Konferenca e Ambasadorëve pritet të shërbejë si forum për diskutimin e sfidave të sigurisë, zhvillimeve gjeopolitike, partneriteteve ndërkombëtare dhe prioriteteve të diplomacisë së Kosovës në periudhën e ardhshme.