Autoritetet gjyqësore të Serbisë kanë nisur procedurë penale ndaj shtetasit të Republikës së Kosovës, Dukagjin Maxhuni, të cilit i është caktuar masa e paraburgimit prej 30 ditësh, nën dyshimet për përfshirje në krime lufte të vitit 1999.
Lajmin e ka bërë të ditur Ministria e Punëve të Jashtme dhe Diasporës e Kosovës, e cila ka njoftuar se ka ndërmarrë menjëherë veprime diplomatike lidhur me rastin.
Përmes Zyrës Ndërlidhëse të Kosovës në Serbi, ministria ka njoftuar Delegacionin e Bashkimit Evropian në Serbi, ndërsa ka dërguar edhe notë verbale te misionet diplomatike të vendeve të Quint-it të akredituara në Serbi.
Sipas MPJD-së, qëllimi i këtyre veprimeve është sigurimi i angazhimit të partnerëve ndërkombëtarë për mbrojtjen e të drejtave dhe sigurisë së shtetasit të Kosovës.
Ambasadori Jashari në kontakt me familjen
Ambasadori i Kosovës në Serbi, Jetish Jashari, është në kontakt të vazhdueshëm me familjen e Dukagjin Maxhunit.
MPJD ka bërë të ditur se, përmes Zyrës Ndërlidhëse, do të procedohet edhe kërkesa zyrtare për lejimin e vizitës së Maxhunit. Vizita pritet të realizohet gjatë javës së ardhshme.
Ministria ka deklaruar se do të vazhdojë ta monitorojë nga afër rastin dhe se do të ndërmarrë të gjitha veprimet e nevojshme diplomatike për mbrojtjen e të drejtave të shtetasve të Republikës së Kosovës.
MPJD: “Do të vazhdojmë monitorimin e afërt të këtij rasti dhe do të ndërmarrim të gjitha veprimet e nevojshme diplomatike për mbrojtjen e të drejtave të të gjithë shtetasve të Republikës së Kosovës.”
