Mungesa e fuqisë punëtore të kualifikuar, kostot e larta të energjisë dhe mungesa e pasardhësve po rëndojnë gjithnjë e më shumë mbi bizneset gjermane. Gati 188 mijë sipërmarrje ndërprenë aktivitetin gjatë vitit të kaluar, duke shënuar nivelin më të lartë të mbylljeve në pothuajse dy dekada.
Rreth 187.744 biznese në Gjermani ndërprenë aktivitetin gjatë vitit të kaluar, një rritje prej gati 10 për qind krahasuar me vitin paraprak.
Të dhënat janë publikuar në analizën vjetore të përbashkët të agjencisë së informacionit ekonomik Creditreform dhe Qendrës Leibniz për Kërkime Ekonomike Evropiane (ZEW) në Mannheim.
Sipas analizës, problemet nuk janë më të kufizuara vetëm në sektorët tradicionalisht më të ekspozuar ndaj krizave. Presioni ekonomik po ndihet edhe në gastronomi, shëndetësi dhe industri.
Gastronomia dhe hoteleria ndër sektorët më të goditur
Një nga rritjet më të mëdha të mbylljeve është regjistruar në gastronomi dhe hoteleri.
Gjatë vitit 2025, rreth 15 mijë restorante, kafene dhe biznese akomoduese ndërprenë aktivitetin, rreth 15 për qind më shumë se në vitin 2024.
Edhe ulja e TVSH-së për ushqimet në gastronomi, e cila nga 1 janari 2026 është reduktuar në 7 për qind, nuk duket se ka qenë e mjaftueshme për ta ndryshuar trendin.
Shëndetësia përballet me krizë të veçantë
Edhe sektori i shëndetësisë po përjeton një përkeqësim të vazhdueshëm.
Numri i mbylljeve të bizneseve në këtë sektor ka arritur në rreth 11 mijë raste, pothuajse dyfish më shumë se në vitin 2008.
Vetëm gjatë vitit të kaluar aktivitetin e ndërprenë rreth 5.500 klinika mjekësore, një rritje prej afërsisht 23 për qind krahasuar me vitin 2024.
Një nga arsyet kryesore është dalja e mjekëve në pension dhe mungesa e pasardhësve që do të marrin përsipër drejtimin e klinikave.
Edhe industria po humb biznese
Në sektorin industrial, rreth 11 mijë ndërmarrje ndërprenë aktivitetin gjatë vitit të kaluar, rreth 10 për qind më shumë se një vit më parë.
Eksperti i Creditreform, Patrik-Ludwig Hantzsch, e përshkroi situatën si një “darë krize” që po e godet ekonominë gjermane nga dy drejtime.
Nga njëra anë janë pasiguritë dhe tensionet gjeopolitike, përfshirë luftërat dhe politikat tregtare ndërkombëtare, ndërsa nga ana tjetër janë çmimet e larta të energjisë, burokracia dhe mungesa e fuqisë punëtore të kualifikuar.
Shumica nuk falimentojnë – thjesht mbyllen
Një element veçanërisht shqetësues është fakti se falimentimi formal nuk është arsyeja kryesore e mbylljes së bizneseve.
Studiuesja e ZEW-së, Sandra Gottschalk, tha se vetëm rreth 13 për qind e afro 190 mijë mbylljeve të regjistruara gjatë vitit të kaluar erdhën si pasojë e falimentimit.
Kjo do të thotë se shumica e bizneseve po mbyllen pa procedura formale falimentimi – shpesh për shkak të kostove të larta, mungesës së stafit, pensionimit të pronarëve ose pamundësisë për të gjetur një pasardhës.
Kriza, pra, nuk po shfaqet vetëm përmes kompanive që falimentojnë. Ajo po shfaqet edhe në heshtje: biznese që mbyllin dyert, vende pune që zhduken dhe kompani që nuk gjejnë më njerëz për t’ua vazhduar punën.
Burimi: DW,
