Deputeti i Aleancës për Ardhmërinë e Kosovës, Ramush Haradinaj, ka propozuar që partitë politike në Kuvendin e Kosovës të shqyrtojnë mundësinë e vazhdimit të mandatit të ish-presidentit Hashim Thaçi.
Haradinaj e ka bërë këtë propozim teksa ka folur për ngërçin politik rreth zgjedhjes së presidentit të ri dhe pamundësinë e konstituimit të institucioneve.
Sipas tij, çështja e marrëveshjes për presidentin po përdoret si arsye për shtyrjen e vazhdimit të seancës konstituive.
“Çështja e marrëveshjes për president edhe kjo është alibi që ndodh qëllimshëm. Pra, e shtyn, e shtyn, e shtyn dhe në këtë mandat të dytë. Çdo 48 orë duhet të thirret seanca, nëse do zgjidhje Kurti”, deklaroi Haradinaj.
Ai tha se vazhdimi i mandatit të Thaçit do të duhej të shqyrtohej si një çështje institucionale dhe, sipas tij, si një akt nderi ndaj ish-presidentit.
“Regjimi i Kurtit, me të thënë të drejtën, është nder edhe i kësaj legjislature dhe çdo legjislature që t’ia vazhdojmë mandatin presidentit Thaçi”, u shpreh ai.
Haradinaj pretendoi se mandatit të Thaçit i ishte dhënë fund përmes një “ndërhyrjeje ligjore” dhe tha se rikthimi i tij do të përbënte, sipas tij, një kundërpërgjigje ndaj atyre që ai i cilësoi si “armiq të Kosovës”.
“Atij i është marrë mandati nga një ndërhyrje ligjore dhe me kthimin e tij, është në nderin tonë si shqiptarë, si komb, jo për shkak të ndonjë afërsie partiake a politike, por për shkak të një kundërpërgjigjeje armiqve të Kosovës, që kurrë nuk flejnë, që t’ua vazhdojmë mandatin”, tha Haradinaj.
Propozimi i Haradinajt vjen në një kohë kur partitë politike vazhdojnë përplasjet rreth zhbllokimit të institucioneve dhe zgjedhjes së presidentit të ri të Kosovës.
