Policia e Kosovës ka njoftuar se ka identifikuar dhe arrestuar një grua të dyshuar për ushtrim të dhunës fizike ndaj një të miture në Mitrovicën e Jugut.
Sipas Policisë, rasti është zbuluar dhe hetuar nga hetuesit e Stacionit Policor Jugu në Mitrovicë të Jugut.
E dyshuara, një grua kosovare, është arrestuar pas sigurimit të provave materiale, përfshirë edhe një video të publikuar në rrjetet sociale, në të cilën, sipas Policisë, shihet e dyshuara duke e sulmuar fizikisht dhe rrahur viktimën e mitur.
Pas rastit, viktima ka kërkuar tretman mjekësor.
Pas përfundimit të procedurave të intervistimit, me aktvendim të prokurorit kompetent, të dyshuarës i është caktuar masa e ndalimit policor prej 48 orësh.
Rasti është iniciuar për veprën penale “Lëndim i lehtë trupor” dhe po hetohet në koordinim me Prokurorinë kompetente.
