Shtetet e Bashkuara po përgatiten të zgjerojnë ndjeshëm sanksionet ekonomike ndaj Iranit, ndërsa presidenti amerikan Donald Trump ka deklaruar se ekonomia iraniane “po shembet plotësisht”.
Trump e bëri deklaratën përmes një postimi në Truth Social, përpara konferencës për shtyp të sekretarit të Thesarit, Scott Bessent, i cili pritet të njoftojë një paketë të re masash ekonomike ndaj Teheranit.
Sipas njoftimeve, administrata amerikane po përgatit zgjerimin e sanksioneve dytësore, të cilat do të prekin edhe shtete dhe kompani që vazhdojnë të bëjnë biznes me Iranin.
Bessent ka paralajmëruar një ofensivë të gjerë ekonomike, duke thënë se objektivi i Uashingtonit është të ndërpresë burimet ekonomike që mbështesin regjimin iranian.
Irani kërcënon me bllokimin e Hormuzit
Teherani i ka kundërshtuar kërcënimet amerikane dhe ka paralajmëruar se, nëse konflikti vazhdon, mund të ndërpresë eksportet e naftës nga rajoni.
Autoritetet iraniane kanë paralajmëruar gjithashtu anijet që të mos kalojnë nëpër Ngushticën e Hormuzit pa lejen e Iranit.
Ngushtica e Hormuzit është një prej rrugëve më të rëndësishme të transportit energjetik në botë. Nëpër të kalon zakonisht rreth një e pesta e naftës dhe gazit global, çka e bën çdo ndërprerje të mundshme një kërcënim serioz për tregjet ndërkombëtare.
Masat e reja amerikane vijnë pas një serie ultimatumesh të administratës Trump, disa prej të cilave më pas janë zbutur për t’i lënë hapësirë diplomacisë.
Ndërkohë, tensionet mes Uashingtonit dhe Teheranit kanë filluar të reflektohen edhe në ekonominë globale, veçanërisht përmes rritjes së çmimeve të naftës.
